ჩვილობის პერიოდი ესაა ბავშვის პირველი კონტაქტი გარესამყაროსთან. ამ დროს ბავშვი იწყებს მის შემეცნებას გრძნობის ყველა ორგანოს გამოყენებით: ეხება საგნებს, გემოს უსინჯავს, ატრიალებს საკუთარი თვალების წინ, სუნავს, არტყამს სხვა საგნებზე და უსმენს ხმას.

მნიშვნელოვანია, სათამაშოები შევარჩიოთ ისე, რომ შეეძლოს ხუთივე სენსორული არხის გააქტიურება. დაგვჭირდება: ჩხრიალები (სასურველია, სხვადასხვაგვარ ხმებს გამოსცემდნენ), საღეჭი სათამაშოები, სხვადასხვა ფაქტურის სათამაშოები, სუსტად მანათობელი (მკვეთრი ნათების სათამაშოებმა შეიძლება გამოიწვიოს ზედმეტი აღგზნება) ან მკვეთრი ფერის სათამაშოები, საწოლის თავზე დასამაგრებელი მბრუნავი სათამაშოები, რომელიც უკრავს სასიამოვნო მელოდიას (აჯობებს, არ იყოს სიმღერა, რადგან მსგავსი ქართულენოვანი სათამაშოები არ არსებობს, უცხო ენის მოსმენა კი არ არის რეკომენდირებული მეტყველების გამართულად დაწყებამდე). ხელის გაწვდენის მანძილზე ჩამოკიდეთ სათამშოები რეზინზე, რომელსაც მოქაჩავს და მიიტანს სახესთან ახლოს.

თამაშის დროს უფროსმა უნდა წაახალისოს (გაუღიმეთ, დაუყვავეთ…), რომ მოახდინოს მზერის ფიქსაცია სათამაშოზე, ასევე მზერა გააყოლოს მოძრავ ობიექტებს (მკვეთრი ფერის სათამაშოს ადვილად აღიქვამს ბავშვი), დაიკავოს სათამაშო ჯერ ერთ, მოგვიანებით კი ორივე ხელში ერთდროულად, გადაიტანოს სათამაშო ერთ ხელიდან მეორეში.

გაითვალისწინეთ, რომ სანამ  ბავშვი დამოუკიდებლად შეძლებს სათამაშოს ხელში დაკავებას, თქვენ უნდა ჩაუდოთ გაშლილ ხელში, მოახრევინოთ თითები და დაეხმაროთ, რომ შეინარჩუნოს ის ცოტა ხანს. ასევე თქვენ უნდა დაეხმაროთ მმოგვიანებით, რომ საგანი, რომელიც უჭირავს ხელში ამოძრაოს, მიიტანოს პირთან, მოკიდოს მეორე ხელი, შეახოს/ სხვა საგნებს.

სათამაშო თავიდან დაიკავეთ მასთან ახლოს, ისე რომ ადვილად შეძლოს მისი მოპოვება, შემდეგ კი მანძილი დააშორეთ, ასევე დაიკავეთ ოდნავ მის მარჯვნივ, მარცხნივ, ზევით, ქვევით. დაეხმარეთ, ისწავლოს საგნის პირთან მიტანა. ტრიალის, ცოცვის, ხოხვის წასახალისებლად წოლის დროს მისი საყვარელი საამაშოები დაალაგეთ მისგან ოდნავ მოშორებით სხვადასხვა მხარეს, რათა ჰქონდეს მოტივაცია გადასაადგილებლად.

უსაფრთხოებისთვის გაითვალისწინეთ: ამ ასაკში სათამაშო არ უნდა იყოს მძიმე, არ უნდა ჰქონდეს ბლაგვი კიდეები და დამზადებული იყოს უსაფრთხო მასალით (არ შეიცავდეს მძიმე მეტალებს ან სხვა ტოქსიკურ ნივთიერებებს).